Furlan
Italiano
Fruts sigûrs su lis stradis. I conseis di Alc&cè.
Ce si fasie devant di un cartel taront cul ôr ros? E cuant che il semafar al è zâl? E cuant che al lampe? Lu sclarìs il speciâl dal ultin numar di Alc&cè, il gjornalut par fruts dut in marilenghe, par cure di Erika Adami. Une piçule vuide par scomençâ a cognossi lis regulis par movisi, in sigurece, su la strade: cemût lei i segnâi di pericul, di proibizion, di oblic, di indicazion; cemût compuartâsi devant dai diferents colôrs dal semafar; conseis par cuant che si è in bici.
Di stradis al fevele ancje l’util vocabolari par imagjinis. Il protagonist di “Perlis di nature” al è il corvat: un uciel scuasi perfet - svelt e braurôs -, ancje se al è mâl considerât di ducj. Tal “cjantonut dal fâ” si insegne a fâ un biel puzzle. A tornin i Gnognosaurs, Pantiagneur e Barburice cu lis lôr aventuris a fumets, e i zûcs, par divertîsi imparant la lenghe. Te rubriche sportive, si pues lei la interviste al zovin campion dal mont di motonautiche, Formule 1000 internazionâl, David Del Pin, di Maran.
Alc&cè – suplement mensîl dal setemanâl la Vite Catoliche, realizât cul contribût de Agjenzie regjonâl pe lenghe furlane – al ven doprât in cetantis scuelis de regjon dulà che si insegne la lenghe furlane. I docents che a vuelin ricevilu pai lôr arlêfs, sore nuie, a puedin domandâlu telefonant al numar 0432/242611, mandant un fax al 0432/242600, o une e-mail ae direzion: amministrazione@lavitacattolica.it
I numars dal gjornalut si puedin scjariâ, in formât pdf, dal sît de la Vite Catoliche: www.lavitacattolica.it
