Furlan
Italiano
FONTANINI,«PLUI FURLAN TES SCUELIS SECONDARIIS DI SECONT GRÂT»
Fontanini, Zanon e Duca
Rinfuarçâ i progjets par valorizâ la lenghe e la identitât furlanis no dome pai plui piçui ma soredut pai fantats des scuelis secondariis di secont grât. Al è un dai temis frontâts dal president on. Pietro Fontanini vie pal incuintri cul president e il diretôr de ARLeF (Agjenzie Regjonâl pe Lenghe Furlane), o ben, Lorenzo Zanon e Massimo Duca. «In chescj agns si è fat une vore tes scuelis pe infanzie e tes scuelis primariis ancje se, dispès, cun progjets calâts dal alt. Rindi i zovins protagoniscj – al à marcât Fontanini –, invezit, e je une maniere che i students no si spietin e che e je in stât di metiju pardabon in zûc. O soi convint di fat che la adolessence e sedi la etât juste par fâ des riflessions impuartantis su la proprie identitât e par decidi se al è just o no cognossi lis lôr lidrîs. E chest cence gjavâ nuie al studi e al aprofondiment des altris materiis: il furlan no je dome la lenghe des flabis o dai nestris vons, ma un mieç impuartant di une identitât che no va dineade».
Par chel che al inten i progjets a tiermin lunc, Fontanini al à tornât a dî la idee di volê fâ a Udin “La Cjase de identitât”, «un lûc di culture – al à spiegât Fontanini – sul model di chê plui famose di Barcelone, dulà podê meti dongje intune uniche struture dut su la identitât dal popul furlan. Un progjet ambiziôs che al podarà viodi la lûs dome se al sarà condividût. La Provincie, di bande sô, e podarès meti a disposizion l’edifici di viâl Triest, dongje dal Teatro Nuovo Giovanni da Udine. Vile Toppani, pes sôs carateristichis, la sô posizion e la sô metrature, e podarès jessi la sede ideâl».
Vie pal incuintri al è stât frontât ancje il teme sul rûl che e varà di vê la ARLeF, «Un rûl – al à tornât a dî Fontanini – soredut di coordenament par che no sedin plui iniziativis compagnis o doplis e che a sedi une regjie unitarie in chest setôr».
