La Europe des lenghis minoritariis si è dade dongje ai 31 di Otubar stât pe colorade kermesse dal Liet International Festival.

Come tes edizions dai agns indaûr undis grups finaliscj si son sfidâts sul palc dal teatri De Harmonie a Leuwardeen, capitâl frisone dai Paîs Bas.

Ancje te edizion di chest (come che al sucêt aromai di diviers agns) al jere presint ancje un rapresentant de lenghe e culture furlanis.

Il rûl di puartebandiere dal Friûl i è tocjât chest an al aromai lezendari Lino Straulino, che cuntune interpretazion emozionante dal so cjaval di batie Doman al rivât al tierç puest, puartant a cjase il miôr risultât di simpri al Festival, par chel che al inten la musiche di chenti.

La performance di Straulino no varès podût jessi miôr. Intun contest musicâl la che l’impat di sene e la masse sonore a son in stât di condizionâ no pôc la opinion de jurie internazionâl, e il nestri Lino al à metût in sene la scletece e la intense poesie che di simpri a caraterizin il so personaç.

Il contestoriis furlan al à decidût di frontâ lis mil personis, par dî pôc, presentis in teatri compagnât dome de sô ghitare, creant un cidinôr e une concentrazion sbrocadis intun batiman liberatori e plen di emozion (une des reazions plui cjaldis de serade).

Ma come in ogni epiche e vere sfide di balon ancje la fortune e à zuiât une part fondamentâl, condizionant la maniere di funzionâ dal microfon juste su lis ultimis strofis de cjançon.

E cussì la jurie internazionâl e à decidût di premiâ ancjemò une volte la operazion ben metude adun di un grup Sami. Pe cuarte volte la minorance etniche linguistiche lapone e à puartât a cjase la vitorie in gracie dal grup SomBy; une sorte di Iron Maiden al feminin cuntune etât medie che no passe i disevot agns.

Par dî il vêr nol podeve no jessi viodût il “shock culturâl” rapresentât di un grup cussì rumorôs e al stes moment cussì leât ae sô lenghe e al lôr colorât custum tradizionâl.

A rivin al secont puest i rapper sarts Dr Drer & CRC Posse, che a àn vuadagnât l'acès ae fase finâl dal Festival daspò de selezion al Festival Suns che si è davuelt propit a Udin il mês di Setembar stât, in gracie dal contribût de Agjenzie Regjonâl pe Lenghe Furlane (ARLeF).

Nuie ce dî nancje sul standard une vore alt de organizazion (in chest i popui dal nord a son simpri une garanzie), cussì come chel de senografie dal spetacul. No stupìs alore la cressite costante dai visitadôrs che a rivin di ogni bande di Europe par chest event, cussì come il numar alt di no crodi di media (jenfri chescj ancje CNN e BBC).

Cheste edizion 2009 dal Liet International e je stade une conferme ancje pe ARLeF (rapresentade a Leuwardeen dal conseîr di aministrazion Vittorio Zanon) di trop che al è impuartant continuâ a investî te partnership de nestre regjon in chest event, tornant a confermâ la sô candidature par organizâ une edizion dal Liet chenti.

Il 2011 al è une vore dongje e in curt ancje la citât di Udin e podarà ospitâ cun braure un event che aromai al ven cjalât cun interès di dute Europe.