Furlan
Italiano
Cunvigne dai 4 di Avrîl
Sabide ai 04 di Avrîl aes 9.30 si davuelzarà li de sale consiliâr dal Municipi di Trep Grant, in place Marconi 3, la cunvigne che la ARLeF e organize par aprofondî il teme de tutele des minorancis linguistichis, a 10 agns de jentrade in vore de Leç 482/99.
Si fevelarà dal des lenghis minoritariis presintis sul teritori regjonâl e dal lôr ûs in diviers contescj. Un cuadri gjenerâl e complet, duncje, di chê che e je la situazion des minorancis linguistichis dal Friûl Vignesie Julie.
Te stesse zornade aes 18.30 li de sede dal Comun di Aquilee si davuelzarà un incuintri dai sporteliscj di lenghe furlane, dulà che i operadôrs a podaran confrontâsi su lis lôr diviersis esperiencis.
“La Leç 482/99 – al dîs il diretôr de ARLeF Massimo Duca – e à segnât une tape impuartant tal percors di tutele dal furlan, che al è stât cussì ricognossût uficialmentri lenghe minoritarie de Republiche Taliane“.
“Cumò si cjatìn – al va indenant Duca – a distance di dîs agns de emanazion de Leç 482, par fâ il pont de situazion: analizâ ce che al è stât fat, evidenziâ eventuâls lacunis o incongruencis, cjatâ gnovis ocasions e stimui par continuâ tal lunc percors di difusion e tutele di une lenghe minoritarie come che e je il furlan”.
A parteciparan al dibatit: il dot. Bojan Brezigar che al analizarà la cuestione des minorancis linguistichis tal contest european; la dot.e Velia Plozner che e fevelarà dal teme des minorancis linguistichis gjermanichis in Italie; il dot. William Cisilino cuntun intervent sui cetancj aspiets de Leç 482; il dot. Federico Vicario che al frontarà il teme tal setô universitari; il dot. Marco Stolfo che al tratarà il teme des lenghis minoritariis te publiche aministrazion; il dot. Donato Toffoli cuntun aprofondiment su la Leç 482 e la informazion.
A saran presints naturalmentri il President de ARLeF, che al puartarà i salûts de Agjenzie, e il Diretôr de ARLeF che al moderarà l’incuintri.
