Si comuniche che la ARLeF – Agjenzie regjonâl pe lenghe e vûl sostignî, cuntune convenzion di pueste cu lis scuelis dal oblic, 'Cors di scriture creative par fantats in lenghe furlane' finalizâts a sensibilizâ i zovins des scuelis ae lenghe furlane.

Tignût cont che la produzion leterarie di tescj in lenghe furlane e costituìs un dai obietîfs pe fruizion e l’incressi dal status de lenghe, al pâr cetant oportun incentivâ a nivel scolastic la capacitât di scriture dai arlêfs e il confront cui autôrs za afermâts di oparis in lenghe furlane.

Cun di plui, stant che il Comun di Codroip al bandìs di cualchi an il “Premi leterari in lenghe furlane par students des scuelis mediis inferiôrs S. Simonut, la ARLeF e calcole che chest apontament al puedi deventâ une buine ocasion di stimul pai zovins e pe lôr creativitât intal ûs de lenghe furlane.

Par ches si à decidût  di condividi la azion promozionâl dal premi leterari e favorî la partecipazion dai fantats, che a cjataran in chest une ocasion par impegnâsi inte lenghe furlane ancje dal pont di viste de scriture creative.

La Agjenzie e invide si che duncje lis scuelis secondariis di prin grât a proponi Cors pratics di scriture creative in lenghe furlane cul fin di incoragjâ i lôr arlêfs a produsi tescj di narative e a concori po daspò, cui elaborâts che a saran ritignûts miôr, al sore nomenât Premi S. Simonut.

Inte promozion dai Cors di scriture creative par fantats lis scuelis a varan di atignîsi a ce che al ven dit achì sot:

a)  I Cors a varan di jessi fats in lenghe furlane e in grafie uficiâl, a podaran jessi fats di insegnants e/o di esternis che a cognossin une vore ben il mont zovin e il rapuart che i fantats a àn cu la leterature.

A varan di jessi scomençâ cun Setembar dal 2010 e davuelts dilunc dal an scolastic 2010-2011.
b)  I docents a daran ai fantats nozions teorichis specifichis su cemût che si cree un test leterari, ur fasaran sperimentâ cun laboratoris cemût che si crein i tescj di gjenar naratîf e ur insegnaran sedi a manipolâ tescj che za a esistin, a trasformâju in tescj gnûfs, diviers e origjinâi, sedi a creâ dai tescj ex novo.

Intal disvilupâ i gjenars naratîfs e la maniere cemût realizâju (conte realistiche o di invenzion, di fantasience, zâl, test teatrâl, gjornalistic….) a varan dal sigûr di tignî cont des preferencis dai fantats.

c)  I fantats a varan di imparâ in chest mût a cognossi e a doprâ lis diviersis tecnichis e i stîi naratîfs (de descrizion, dal dialic, dal monolic, dal inseriment di gnûfs personaçs…), ma ancje a progjetâ tramis e personaçs plui pussibii coerents, dal pont di viste linguistic, cui aspiets de furlanetât contemporanie e no di chê dal passât.

d)  Ogni Cors al varà di jessi destinât a almancul 15 arlêfs e al varà di produsi no mancul di 3 (trê) elaborâts individuâi e/o di grup.

I lavôrs fats a varan di jessi di almancul cuatri cartelis di no mancul di 1.800 (milevotcent) batudis ognidune.

I elaborâts produsûts a varan di jessi inviâts ae Agjenzie, par documentâ dal lavôr fat, e al Comun di Codroip par concori al Premi S. Simonut inte edizion dal an daspò di chel dai cors.

e)  Di bande sô il Comun, dutun cu la ARLeF, si impegnarà a dâ ricognossiment e a valorizâ i lavôrs plui significatîfs e di cualitât, ancje par mieç de lôr publicizazion e difusion.

Il budget previodût par chescj Cors di scriture creative par fantats in lenghe furlane al è di € 30.000,00 (euros trentemil/00), cjapât dentri dut.

Par ogni cors al è previodût un finanziament massim di € 1.500,00 (euros milecinccent/00), cul rimbors pai docents. Par comprâ materiâl eventuâl nol podarà jessi impegnât plui dal dîs par cent dal impuart assegnât.

Lis scuelis che a vuelin partecipâ al progjet sore nomenât a varan di presentâ:

- une relazion in detai cu la propueste su lis modalitâts organizativis dai cors (numar dai cors di ativâ, numar dai fantats ametûts par cors, numar di oris di durade dal cors, ……) e dai contignûts dai stes;

- un curriculum curt dai insegnants o e/o dai esperts esternis che a tignaran il cors;

- il preventîf in detai dai coscj dai cors, che po daspò a varan di jessi rendicontâts.

Lis scuelis interessadis a son invidadis a fâ rivâ lis propuestis li de sede de ARLeF - Agjenzie regjonâl pe lenghe furlane, place XX Setembar n. 23, 33100 Udin, dentri di 30 di Jugn dal 2010.

Il Diretôr de ARLeF

(dr. Massimo Duca)