Furlan
Italiano
Convocazion dal Comitât tecnic sientific (C.T.S.) de ARLeF
Joibe ai 26 di Març 2009, aes 15.00, li de sede de ARLeF in place XX Setembar, al è clamât dongje la prime riunion dal gnûf Comitât tecnic sientific de Agjenzie, par discuti e impostâ chê che e sarà la ativitât dal organisim, i siei prossims intervents, lis modalitâts operativis.
I siet components, sielts daûr des areis di competence specifiche, a son la professore Alessandra Burelli e il professôr Pierino Donada, clamâts a partecipâ tant che esperts te didatiche de e te lenghe furlane, la dotore Maria Carminati, esperte te produzion artistiche, musicâl e multimediâl, il dotôr William Cisilino e il dotôr Luca Peresson, competents tal ûs de lenghe furlane traviers i mieçs di comunicazion di masse, la professore Piera Luisa Rizzolatti e il dotôr Donato Toffoli, esperts di planificazion linguistiche.
“Al è fondamentâl – al à declarât intune note il President Lorenzo Zanon– impostâ fin dal principi dutis lis ativitâts dal Comitât tecnic sientific e la programazion dal medie e lunc periodi, par podê cussì massimizâ i risultâts e vê ben clare la linie programatiche che si intint seguî.”
“Che – al continue ancjemò Zanon – al è impuartant sei par osservâ il principi di trasparence che al à di guidâ dutis lis ativitâts de ARLeF, sei par ripartî justementri, aes lûs di ducj chei che a saran i impegns de Agjenzie, lis risorsis finanziariis e umanis a disposizion.”
Al è impuartant impensâ che il rûl principâl dal Comitât tecnic sientific de ARLeF, nomenât dal Consei di Aministrazion cuntune carghe che e dure trê agns e che e pues jessi riconfermade come tal câs di Alessandra Burelli, William Cisilino e Donato Toffoli, al è chel di inviâ cualsisei iniziative che e puedi promovi il scambi di cognossincis e l’aprofondiment sientific e culturâl tal setôr de promozion e divulgazion de lenghe furlane te vite sociâl e culturâl moderne.
Jenfri i compits principâi dal organisim si contin la planificazion pe introduzion de lenghe furlane jenfri i insegnaments previodûts dai programs scolastics, la formulazion dal program anuâl des ativitâts de Agjenzie, la analisi dai programs di intervent regjonâi tal setôr de politiche linguistiche e des diretivis relativis al ûs de lenghe furlane tes ativitâts istituzionâls e tai rapuarts cui citadins e la organizazion di cunvignis, seminaris, incuintris di studi.
