Furlan
Italiano
Ce fâ vie pal Istât? Gnûf numar di Alc&cè
Ce fâ vie pal Istât? Si pues lâ ae scuvierte dal Friûl. De mont al mâr, passant pes culinis. A pît o in bici. E je la propueste dal ultin numar di Alc&Cè, il gjornalut par fruts dut in marilenghe, par cure di Erika Adami. Trê itineraris di provâ par cognossi miôr cheste tiere e la sô biele nature: il prin al puarte intun lûc di incjant, il lât Dimon, une perle blu tal mieç di un cjadin vert des Alps Cjargnelis, tra Paulâr e Paluce; il secont, al lât di Ruvigne, ultin sorevivût dai agadins nassûts daspò il ritirâsi dal grant glaçâr dal Tiliment; il tierç, a Bielvedê di Aquilee, li che l’ultin blec di Friûl si da su la lagune di Grau.
Po dopo, te rubriche “Perlis di nature” si va a da un cuc tai flums e tai lâts furlans, li che a vivin plui di trente cualitâts di pes. Une vere ricjece. Par rinfrescjâsi tes zornadis cjaldis, parcè no provâ cualchi spedine di pomis? Il “cjantonut dal fâ” al insegne a fâlis. A tornin i Gnognosaurs, Pantiagneur e Barburice cu lis lôr aventuris a fumets; i zûcs, par divertîsi imparant la lenghe; la rubriche sportive cuntune interviste ae zovine campionesse di softball, Irene Michielan, di Porpêt. Alfin, ce isal il forcjàs? E la volantine? Par scuvierzilu, al baste lei l’utilissim vocabolari par imagjinis.
Alc&Cè – suplement mensîl dal setemanâl la Vite Catoliche, realizât cul contribût de Agjenzie regjonâl pe lenghe furlane – al ven doprât in cetantis scuelis de regjon dulà che si insegne la lenghe furlane. I docents che a vuelin ricevilu pai lôr arlêfs, sore nuie, a puedin domandâlu telefonant al numar 0432/242611, mandant un fax al 0432/242600, o une e-mail ae direzion: amministrazione@lavitacattolica.it
