Furlan
Italiano
Antologjie de gnove musiche furlane. Cunvigne di presentazion.
Sabide ai 14 di Fevrâr aes 17.30 li de Sale Ajace si davuelzarà la cunvigne di presentazion de “Antologjie de gnove musiche furlane – Progjet Suns”, progjet curât di Luigi Gregoris e nassût de colaborazion jenfri il Comun di Udin, il CIRF-Universitât dal Friûl e la ARLeF.
E je une piçule racuelte, dodis esemplis musicâi, creade par riassumi lis liniis guide de gnove musiche furlane, un moviment musicâl scomençât tai agns Novante e che vuê al à cjatât une sô consistence e continuitât.
Fenomen che al à cjapât dentri une vore di musiciscj (te antologjie Suns si puedin cjatâ tocs di Raul Lovisoni, Lino Straulino, Zuf de Zur, Furclap) impegnâts a leâ la lenghe furlane cun diviers gjenars musicâi, de tradizion ae sperimentazion daûr de inovazion de culture, dal costum, de editorie (no dome locâl) e dal marcjât (no dome discografic).
“Pardabon un imprest – al declare intune note Massimo Duca Diretôr de ARLeF – che al da conferme des tantis pussibilitâts che la lenghe furlane e da e e permet di disegnâ une panoramiche di ce che si è davuelt in Friûl tai ultins vincj agns tal rapuart jenfri musiche e lenghe.”
Ae cunvigne a parteciparan l’assessôr ae culture dal Comun di Udin Luigi Reitani, Lorenzo Zanon (president de ARLeF), Massimo Duca (diretôr de ARLeF), Luigi Gregoris (curadôr de antologjie pal Cirf / Universitât dal Friûl), Valter Colle (produtôr de opare), Paolo Cantarutti (rapresentant dal comitât tecnic sientific de ARLeF).
A saran presints ancje cetancj dai musiciscj cjapâts dentri te produzion e jenfri chescj, un spazi particolâr al sarà dedicât a Glauco Venier, che si è fevelât di pôc par una candidature ai "Grammy" dal so ultin cd "Distances”.
A Glauco Venier, pe ocasion, e vignarà consegnade la targhe che l'Osservatori dai gjornaliscj di Musiche (pe gnove musiche furlane) al veve decidût di dâ il mês di Dicembar stât. Cerimonie che no si jere podût fâ pal impegn tal forest dal musicist furlan.
Tant che ringraziament Glauco Venier al concedarà pe ocasion une performance curte e esclusive di piano solo.
