Furlan
Italiano
ALBA PRATALIA ARABA - La leterature in lenghe furlane. Dinamichis tindincis prospetivis
Miercus ai 26 e joibe ai 27 di Mai - Il program des iniziativis
Cuâl isal il puest de leterature tal disvilup de lenghe furlane viers une condizion di lenghe doprade in dutis lis situazions culturâls e sociâls?
Cheste domande e pues jessi considerade tant che il moment li che a confluissin altris cuestions e altris domandis.
Par esempli chê, une vore gjenerâl, su la impuartance de scriture creative te societât informatiche e telematiche e su la funzion dal artist in cheste realtât simpri plui “licuide” e globalizade.
E, ancje , su ce influence che la leterature e à, o e pues vê, tal ricognossisi di une comunitât tant che realizazion concrete de pluralitât culturâl e linguistiche dal gjenar uman.
Domandis intrigosis che a rivuardin parie critiche leterarie, sociolinguistiche e lis politichis linguistichis inviadis e metudis in vore in diferentis realtâts di lenghe minoritarie.
Par cirî une rispueste almancul parziâl o vin volût clamâ a un dibatiment esperts e autôrs furlans e europeans che di timp incà a rifletin su la leterature e su une leterature in lenghe di minorance. Realtâts diferentis cun storie e nivei di cussience cetant diviers ma tignudis adun de lôr subordenazion tai confronts des lenghis plui dopradis.
E chest dibatiment al sarà il troi prontât par un confront tra i operadôrs che a lavorin in manieris cetant diferentis e vivarosis pe leterature e pe lenghe furlanis.
Par finî une ufierte e une cerce di esperiencis di caratar linguistic creatîf in Friûl par pandi in maniere direte un pocjis des liniis di direzion in cjamp artistic che si movin te contemporaneitât.
Il program si pues discjamâ scliçant su chest leam:
ALBA PRATALIA ARABA - La leterature in lenghe furlane. Dinamichis tindincis prospetivis
