Furlan
Italiano
Al torne Radio Dîs su Onde Furlane
La vôs dai arlêfs des scuelis mediis e superiôrs ae radio intun progjet volût e finanziât de Agjenzie Regjonâl pe Lenghe Furlane (ARLeF) tal so plan di ativitât pal 2009.
Dek il Ceesa
E torne la trasmission radiofoniche Radio Dîs, curade di Michele Polo e realizade cu lis vôs dai arlêfs des scuelis mediis e superiôrs furlanis, integradis dai intervents di insegnants e referents scolastics.
La prime pontade dal program, che al larà in onde une volte par setemane, e sarà trasmetude miercus ai 20 di Zenâr aes 13.30, su Radio Onde Furlane (FM 90 mhz) e si podarà scoltâ ancje in rêt sul sît www.ondefurlane.eu.
Te trasmission lis fantatis e i fantats a contin in maniere direte il rapuart cu la lôr lenghe mari (sedi che e sei il talian, il furlan, une altre lenghe di minorance o une varietât dialetâl jenfri chês feveladis in Friûl Vignesie Julie, o ancjemò une des lenghis de gnove imigrazion) e lis manieris di esprimisi plurilengâls che si doprin in famee, a scuele e in altris contescj de lôr vite di ogni dì.
La serie radiofoniche però e je in realtât dome la part finâl dal progjet Radio Dîs, finanziât pal secont an di file de ARLeF e realizât di Informazion Furlane - Radio Onde Furlane.
Parcè che Radio Dîs al è prime di dut une conference - spetacul dulà che Gigi Patruno, Michele Polo e Dek il Ceesa, tant che speaker, dj, mc, animatôrs, e metin sù une sorte di radio itinerant dal vîf o un sound system audio visuâl, par doprâ peraulis a la mode, che al previôt la presentazion, par mieç di video-clip, samplers e esecuzions dal vîf, di resintis produzions musicâls, cinematografichis, televisivis e leadis al mont dai media e dal web, che a àn come fatôr comun l'ûs de lenghe furlane o di altris lenghis minoritariis regjonâls.
Propit vie par chescj incuintris a vegnin regjistradis lis vôs che, po daspò, a deventin la materie prime des trasmissions radiofonichis.
Vie pal an scolastic 2009/2010 Radio Dîs al ven presentât in 18 scuelis medie e superiôrs des Provinciis di Udin, Gurize e Pordenon, cjapant dentri cussì dut il teritori dal Friûl storic.
