Furlan
Italiano
“I COLÔRS DE LENGHE FURLANE” AL PARC DAL CORMÔR
“Voe di contâus!” di e cun Dino Persello, poiât de ARLeF te suaze di une colaborazion jenfri la Agjenzie stesse e Home Page Festival pe promozion de Lenghe Furlane- vinars ai 20 di Avost aes 20.30 alì dal Parc dal Cormôr.
Di trê agns in ca Home Page Festival, il contignidôr artistic impuartant e dinamic che al da vite ai vinars estîfs de citat di Udin alì dal Parc dal Cormôr, al fâs de sô origjinalitât, frescjece e inovazion, un event vincent che al è daûr a deventâ in dut e pardut un da apontaments plui spietât de Istât citadine.
La iniziative previodude pes 20.30 di vinars ai 20 di Avost alì de aree dai laboratoris, al è cence dubi une primizie origjinâl in cheste suaze.
Al è cun di fat un intrateniment teatrâl peculiâr in Lenghe Furlane, “Voe di contâus!” di e cun Dino Persello, poiât de ARLeF (Agjenzie Regjonâl pe Lenghe Furlane) te suaze di une colaborazion jenfri la ARLeF stesse e Home Page Festival pe promozion de Lenghe Furlane.
Il protagonist al è Dino Persello, di Dignan, che al fonde i siei percors teatrâi passâts te ete dal teatri amatoriâl furlan, un personaç ustinât che nol à mai molât il vues e, cun tante voie di tornâ a metisi in discussion, al à confezionât chest spetacul teatrâl dut di viodi.
In “Voe di contâus!” cemût che si lei te schede di presentazion dal spetacul, Dino Persello al trasmet un desideri grant di contâ ancje cui colôrs des variantis orâls de Lenghe Furlane (che a son ricjece e fuarce vere de stesse), ma tal stes timp al fâs vignî fûr une esigjence fuarte di “scoltâ”, mediant cheste forme di teatri minim (no palc, no sipari, no efiets di sene… no sint sint la bisugne), funzionâl, fin e une vore preseât.
“Voe di contâus!” ven a stâi: scoltâ, cognossi, ricuardâ vuê, savietât popolâr, frescjece, usancis, umorisim, satire, ironie, autoironie, riflessions… ridadis.
Home Page Festival e ARLeF a àn duncje crodût, poiantlu, in chest progjet curiôs, peculiâr, intim, divertent… di no pierdi!
