Furlan
Italiano
“100% FURLAN"
Chi il program
Martars ai 26 di Mai dal 2009 la ARLeF, cul patrocini dal Comun di Udin, e presente “100% Furlan: presentazion dai progjets Radio dîs e Fâs fûr l’an”.
L’apontament al è in sale Ajace in place Libertât (Palaç dal Comun) aes 18.00 par une interessante serade di animazion: daspò di une curte presentazion dai progjets, di fat,i artiscj protagoniscj des dôs iniziativis si esibiran intune sintesi des ativitâts davueltis pe promozion de lenghe furlane tes scuelis secondariis di prin e secont grât.
I doi progjets a àn viodût la lenghe furlane jentrâ tes scuelis dal nestri teritori par mieç di artiscj (condutôrs, atôrs, gjornaliscj, poetis, dj, rapper...) che a àn mostrât ai zovins cemût che la lenghe furlane e pues jessi doprade in musiche, te conduzion e programazion radio, tai films, te leterature e tal mont de rêt Internet (videos, filmâts, sîts...).
“Cun Radio dîs e Fâs fûr l’an – al à dit il diretôr de ARLeF Massimo Duca – o sin rivâts a cjapâ dentri uns 2000 students di 30 scuelis secondariis des provinciis di Udin, Gurize e Pordenon. I risultâts vûts a son stâts une vore positîfs di sodisfazion, cun di fat plui di cualchi sogjet al à za pandût il so interès par tornâ a presentâ la iniziative, magari indreçantsi ancje a un public no dome di zovins ma ancje di grancj”.
“La fuarce dai progjets – al declare cun di plui il president de ARLeF Lorenzo Zanon – e sta te formule cemût che a son stâts svilupâts: lezions frontâls e incuintris direts cui zovins, cu la struture di un spetacul, une vore interatîfs e dinamics, cuntun grum di partecipazion e lontans de solit routine scolastiche”.
Pe ocasion, martars ai 26, Dek Ill Ceesa, Michele Polo e Dj Geggio a presentaran Radio dîs, proponint cun musiche, improvisazion, cjançons, une sintesi dai incuintris che si son davuelts tes scuelis, par mieç di une postazion Dj set itinerant, e po deventâts un program radio mandât in onde su lis frecuencis di Radio Onde Furlane.
Alessandra Kersevan, Claudio Moretti, Arianna Zani, Dj Tubet e Alessio Velliscig a saran invezit i protagoniscj de rapresentazion di teatri – leterature – musiche che e met in struc Fâs fûr l’an, ven a stâi lis lezions che atôrs, cjantants, musiciscj e poetis, a àn puartât tes scuelis par dimostrâ cemût che la lenghe furlane si adati ben a poesie, contis, famosis oparis di teatri, produzions leterariis.
I doi progjets a fasin part dal plan des ativitâts de ARLeF, tal setôr de promozion e a son stâts curâts de Cooperative Informazion Furlane (pal progjet Radio dîs) e de cjase editore Kappa Vu (pal progjet Fâs fûr l’an).
