Furlan
Italiano
In evidence
Al è vignût fûr il bant de VIII edizion dal Concors par Tescj Cinematografics in Lenghe Furlane.
Organizât dal CEC di Udin, cul finanziament de ARLeF, de Provincie di Udin e dal Comun di Udin, al è vignût fûr il bant de VIII edizion dal Concors par Tescj Cinematografics in Lenghe Furlane.
Il concors, organizât ogni doi agns, al previôt cuatri sezions competitivis: une pes senegjaturis, cuntun prin premi di 1.500 euros, une pes storiis par film, cuntun prin premi di 300 euros, une pai articui di critiche, cuntun prin premi di 300 euros e par finî un pai saçs sul cine cuntun prin premi di 300 euros.
I lavôrs a àn di jessi mandâts li de sede dal CEC in vie Villalta, 24 a Udin (a puedin jessi puartâts ancje a man) dentri dai 13 di Setembar dal 2010. I lavôrs a partecipin in forme anonime ae competizion. Stant al regolament, dentri de buste cui lavôrs e à di jessi zontade, in buste sierade, une letare cu lis gjeneralitâts e la direzion dal concurint.
Lis oparis premiadis e chês calcoladis plui interessantis a saran publicadis te riviste di cine “Segnâi di lûs”.
Tor de fin dal an, la date e à ancjemò di jessi stabilide, e vignarà organizade li dal Visionario di Udin, une serade speciâl di premiazion. In chê ocasion, dongje de consegne dai premis e de consegne dal premi speciâl “Mario Quargnolo” a personalitâts che a vedin dât un contribût fondamentât al nestri cine, a vignaran proietâts films resints e di archivi in rapuart cul sens di cheste iniziative.
Il CEC al à ancje chê di editâ la tesi di lauree sul cine furlan scrite di Sara De Simon, tesi che e vignarà publicade in trê lenghis: furlan, talian e inglês.
La partecipazion al concors, tant che la jentrade ae serade speciâl a son sore nuie.
Par vê il bant dal concors e par vê altris informazions si pues telefonâ al CEC tel. 0432-299545
