Gianni Gragoricchio "zardinîr" de culture

Leterature, teatri, cine, musiche, nol è setôr de comunicazion artistiche e leterarie che nol vebi impegnât Gianni Gregoricchio. Nassût di une famee di atôrs diletants, di lôr al à ereditât la passion fin a cjatâ te dramaturgjie la espression plui complete dal so comunicâ leterari. Romanzîr in lenghe furlane, tornade a cjatâ tant che profont “sintî” culturâl, al à colezionât un Premi Santa Chiara e trê Premis San Simon e l’ultin, consegnât postum, pe traduzion de conte “Il Var” di Ippolito Nievo. Tancj i radiodrams, simpri in lenghe furlane, senegjâts par Radio 103 e par RAI 3, che a chescj i à dât vôs tant che atôr, ativitât che nol à mai molât, recitant sei tes sôs comediis che puartant in sene, ancje tant che regjist, lavôrs di Pirandello, Betti, Ionesco e Turoldo. Storiche e fo la rapresentazion de “La terra non sarà distrutta” al Vigorelli di Milan, ae presince dal arcivescul di chê volte Montini (po Pape Paolo VI) sot di une ploie fuartone. Ma al fo il Cine la sô prime passion, il so prin impegn sei tant che “missionari” che membri de Jurie dal “Premio Cineforum “ ae Mostre dal Cine di Vignesie. Tancj i siei saçs critics su la riviste “Cineforum “ dal ’68 al ’72. Nomenât al concors C.E.C. il so impegn tant che senegjadôr. Ma ancjemò plui significatîf al è il ricuart dal so pelegrinâ di gnot di paîs in paîs, di parochie in parochie, a spiegâ il cine, i siei messaçs, la sô fuarce sociâl e culturâl. Tai ultins agns, uçât di un amì sunadôr, si è metût a la prove ancje come peraulant. Cheste la cronache in sumis di chel che Gianni Gregoricchio nus à lassât e dulà che si pues cjatâlu. Di sigûr vuê, altris, miôr e cun plui obietivitât di me, a podaran fevelâ de impuartance e dal impat su la culture furlane dal so lavôr e dal so impegn. Di bande mê o ai vût la responsabilitât di tutelâ ce che lui nus à lassât e o ai chê di fâlu tal rispiet de sô volontât di meti indenant, prime de afermazion personâl, la vierzidure di gnûfs spazis di libertât di pinsîr. Chel che o vuei sotliniâ, invezit, e je la identitât costante fra Gianni Gregoricchio om e Gianni Gregoricchio scritôr. Une identitât che nus oblee a cirî la sô vision des diviersis sferis che a fasin sù une esistence umane e lis sieltis che i van daûr, dome par mieç de sô produzion leterarie. Partint di chê o podìn tornâ a fâ sù l’om, no il contrari.

Par Gianni Gregoricchio scrivi nol jere un mistîr, al jere un mût par rispuindi ae vite, ae realtât che i jere ator. Come fie, mi limitarai duncje a ricuardâ dome la sô onestât e la sô tolerance; il so privilegjâ simpri il dialic al scuintri, considerant interlocutôrs e mai aversaris chei che a vevin opinions diviersis des sôs; la sô vision de culture tant che une plante simpri in cressite e di chê si à di jessi zardinîrs dome il timp che al covente par amâle, curâle e consegnâle cressude e plui fuarte al prossim zardinîr.

                                                                                                     Francesca Gregoricchio

Prose

“Piccole storie avianesi” (Contis); “Chiocciole e lumache” (Flabis), une serie di contis sparniçadis in lenghe taliane tant che “Odissea” (Premi “Santa Chiara”); “Il lupo di Natale” (Flabe). - “Îr e doman” (Romanç – Premi “San Simon”); “Int di borc” (Contis); “Une vite di pôc” (Romanç); “Trê feminis” (Romanç – Premi “San Simon”); “Il soreli te valîs” (Flabis). Altris contis curtis.

Traduzions

“Il Var” Ippolito Nievo ( Premi “San Simon”)

“E cussì e steve Marie”  Le laudi di Jacopone da Todi ( Inedit)

“L’om cu la rose in bocje” Luigi Pirandello (Inedit)

“I sis personacs” Luigi Pirandello (Inedit)

“Tuche-Tiuche” Woody Allen (Inedit)

„Chel ultim istat“  Francesca Gregoricchio (Inedit)

Teatri

I tescj che chi a vegnin nomenâts a àn vût un ducj un ricognossiment tai diviers concors fats de Associazion Teatrâl Furlane. – “Agne Miute”; “Une vite e trê”; “Cjase di arint”, “Storie di Ide”; “Ta chê gnot lusôr di lune”; “Alde dai fruts”; La cjase sul cjanton”; “Une vôs su la albe”; “La semule e la farine”; “Tal zardin, là difûr”; “Int di palût” ;

Radiodrams

“Une sere come tantis”; “Lilie”; “Delchi Barbîr” “ Il sium” plui la riscriture e i adataments di tescj teatrâi o leteraris di cetancj autôrs.

Senegjaduris

“Se finirà la gnot” (Nomenât speciâl al concors C.E.C.)

 “La cjase des ortensis” (Id. id.).

Documentaris

“Un paese in città” RAI 3

Inchiestis televisivis

“Giochi di ieri e di oggi in Friuli” RAI 3

GRAU.doc

Premessa e Avian.pdf